Rugbyklub en Bulldogs vra gemeenskap om Nathan te help
Fondse nog nodig sodat senter volgende week geopereer kan word.
Vanuit alle oorde is daar bydraes gemaak sodat die HTS Middelburg senter, Nathan Jansen van Vuuren, volgende week ’n knie-operasie kan ondergaan.
Die operasie kos R150 000 en die doelwit is nog nie bereik nie.
Die spanbestuurder van die Rooi Bulle eerstespan, Deon van Straaten, sê dat hulle “tweederdes daar is maar nog fondse benodig”.
Middelburg Rugbyklub het intussen besluit om soos Hoërskool Middelburg ook tot die fonds wat gstig is by te dra.
Die Middelburg Rugbyklub afrigter, Henk Wessels, het mense aangemoedig om ’n bydrae te maak.
“Jy het nog baie rugby in jou oor. Hulle noem jou seker Boepens omdat jy almal so afstamp,” het Wessels gesê.
“Sterkte, mag die Here jou seën en mag dit net ’n klein uitdaging wees.”
Chelton de Villiers het namens die Bulldogs sewes rugbyspan gesê Nathan sou met trots die Bulldogs tydens die sewes toernooi in Klerksdorp verteenwoordig het.
Hy het ook ’n beroep gedoen op die gemeenskap om Nathan, wat nie ’n mediesefonds het nie, te help om die bedrag bymekaar te maak.
“Sterkte, ons dink aan jou.”
*Daar is ’n BackaBuddy-skarefinansiering fonds gestig.
Vir navrae of om bydraes te maak kan Van Straaten by 073 233 4073 of hoofafrigter Jano Venter by 082 372 7933 geskakel word.
