’n Jaar nadat sy ernstige beserings opgedoen het tydens die RideJoburg-fietswedren, het Maggie Smit gister weer aan haar eerste padfietswedren deelgeneem.
Na haar groot val is sy in die Netcare Garden City-hospitaal behandel..
Bewussyn verloor
Sy het vyf kilometer na die wegspring geval en haar neus gebreek, haar bolip het gate in gehad, daar was ’n gat aan haar kop waar haar valhelm haar beseer het en sy het krake aan haar pelvis gehad.
Nadat sy geval het, het sy haar bewussyn verloor en dit eers weer in die ambulans herwin.
Dit blyk dat twee fietsryers se handvatsels aan mekaar geraak en hulle toe neergeslaan het.
Maggie moes plastiese chirurgie ondergaan om die skade te herstel.
’n Jaar later
Die 2025 Ride Joburg het op Sondag, 26 Oktober, plaasgevind en nou, ’n jaar later, op 25 Oktober 2026, het sy die Summer Classic-fietswedren oor 91 kilometer in 3:35:30 voltooi. Die wedren het by die Willem Prinsloo Museum, naby die bekende Jan Ellis Garage, begin en geëindig.
“Dit was vir my baie spesiaal en so lekker om deel te kon wees van die fietsryklub se mense, mense so na aan my hart,” het sy vanoggend gesê.
Maar gaan sy weer die RideJoburg aandurf waar sy verlede jaar so hard geval het?
“Ek het nog nie ingeskryf nie, maar ek sal graag weer wil ry.”
Haar man, Johnny, is die voorsitter van die Middelburg Fietsryklub.
