Ai, oupa Hendry van Tonder sou darem trots gewees het!
Twee van sy kleinseuns, Jayden en Justin Olds, is vir Puma spanne gekies.
Jayden is lid van HTS Middelburg se eerstespan en is vir die Puma o/17 A-span gekies en Justin, wat vir HTS Middelburg se o/15 span speel, is vir die Puma o/15 A-span gekies.
Soos hulle oupa, is die twee boeties voorspelers.
Jayden speel nommer ses flank en Justin haker, maar hy is op agsteman vir die Pumas gekies.
Hendry was ’n agsteman wat ook vir Middelburg, Suidoos-Transvaal en Noord-Transvaal, op flank gesak het.
Tydens die veelgeroemde Lionbeker wedstryd teen die Westelike Provinsie in 1983, wat Suidoos met 24-19 gewen het, was hy die nommer sewe flank, Terence Moll op ses en die flambojante Jorrie Jordaan die agsteman.
Van Tonder sou uiteindelik 96 wedstryde vir Suidoos speel.
Tydens sy begrafnisdiens op 15 Desember verlede jaar, het Jayden ’n roerende huldeblyk aan sy oupa gelewer en gesê hy en sy boetie sal alles doen om in sy voetspore te volg.
Die skitterende losvoorspeler is oorlede terwyl hy op ’n leweroorplanting gewag het.
