Tamatie (Tamo) du Plooy, soos sy spanmaats hom genoem het, was ’n meneer van ’n rugbyslot.
Sy inklim rugby en lynstaanspel het menige span op hulle neuse laat kyk.
Maar toe gebeur, wat met die meeste rugbyspelers gebeur, sy knieë wou nie meer nie.
“My knieë was in hulle maai en my rugbyloopbaan verby.”

Saam met die onaktiwiteit het sy gewig soos die petrolprys begin styg.
Sy rugbyfikselyf het later op 168 kilogram gekreun.
Dit is net hier waar Tamo sy voet neergesit, by Willoway aangesluit, en begin oefen het.
“As dit nie hiervoor was nie, was ek seker nie meer hier nie.”

Die 168kg. het sooos botter in die son begin wegsmelt, kilogram, kilogram, kilogramme…én nog kilogramme…
Hy het begin fietsry, die Loskop halfmarathon voltooi en die strawwe Alzu 50 myler twee weke gelede aangedurf. Al het hy ’n spier geskeur, het hy aanhou trap.

By die eindpunt van die Alzu het ’n “slanke” Tamo trots saam met sy broer, Cornus, vir ’n foto poseer.
Daar is nou ’n hele 68 kilogram minder Du Plooy!
Sy volgende mikpunt is ’n Hyrox-uitdaging in die Kaap later die maand.

“Na my rugbyloopbaan was ek in my maai, nou huppel ek soos ’n ballerina,” sê die oudslot.
En mens kan daarop antwoord: Wat ’n inspirasie!