KYK: Bobbejaan verdwyn soos die skim
Inwoners spot dat hy Sondagmiddag op sy eish by Athlonedam gebraai het.
Die bobbejaan wat Roberts Landgoed Donderdag op hol gehad en daarna oor die spoorlyn in die rigting van Aerorand-Wes gehardloop het, het soos die skim verdwyn.
Aerorand-inwoners was nog die naweek op hete kole nadat die bobbejaan eers in Drakensberg- en later in Hexrivierstraat van muur tot muur gespring het.
Die buurt se honde het berserk geraak wanneer die bobbejaan vinnig by ’n erf in is en dan weer na die volgende huis gespring het.
Teen gister is daar op WhatsApp-groepe gevra of die bobbejaan al gevang is.
Gert Meyer het laat weet “hy het vleis gebraai by Athlonedam, maar ek weet nie of hy nog daar is nie”.
Raadslid Hennie Niemann sê die bobbejaan is nog nie gevang nie en daar word nou gespot oor waarheen die bobbejaan kon verdwyn het.
Hervestig
Dieselfde bobbejaan is vier jaar gelede deur Deon Cornelius van Ubhetyan o Africa gevang en hervestig, maar hy het twee jaar later weer sy opwagting op Middelburg gemaak.
Cornelius het hom weer gevang en in die Dullstroom-omgewing vrygelaat.
Die bobbejaan kan aan sy sekelstert en linkerhand, waarvan die vingers styf is, uitgeken word.
Waarheen hy verdwyn het en wanneer hy weer vir ’n paar dae se opwinding op Middelburg gaan sorg, sal net hy weet.
www.tiktok.com/@middelburgobserver/video/7700862377155169556
