O tog, maak vas julle sitplekke, hier kom ’n ding!
Die ‘onmoontlike’-tweeling van die Toks&Tjops Munga span het vanoggend ’n lont onder die sitplekke van die Middelburg Care Rider spanne aangesteek.
Die sussies, Magda Nieuwoudt en Rika Calitz, het gewys dat hulle slaggereed is vir die Munga bergfiets equippe fietswedren, vanaf 26 November tot 1 Desember, vanaf Bloemfontein na Wellington.
Die twee het gewys dat nie eers koue, reën of wind, hulle voorbereiding gaan kortwiek nie.
Hulle het ’n video geplaas waarin hulle vir die ander Toks&Tjops-spanlede vra waarom oefen hulle dan alleen.
@middelburgobserver Die vonke spat tussen Toks en Tjops en Care Riders. Toks&Tjops, CareRiders, Munga
Jy kan amper sê hulle is soos vinkel en koljander, die een trap so hard soos die ander…
Die Toks&Tjops span bestaan uit Magda, Rika, Hammie Wessels, Bakkies Botha en Breyton Paulse.
Onbevestigde nuus uit die Toks&Tjops span, is dat Bakkies dalk die wedren sal misloop, weens ’n skouerbesering. (Ons weet nie wie het hy geduik nie).
Die tweeling se video het skaars die virtuele wêreld getref en die Care Riders se Andre Brandmuller het teruggevuur, met ’n boodskap waarin hy sê dat dit “hartseer is dat die Toks&Tjops ryers die meisies so alleen laat oefen”.
Hy het ook ’n persoonlike boodskap vir Magda gehad, wat voorheen aan Hoërskool Middelburg verbonde was.
Hy sê as sy eers die water van die Klein Olifantsrivier gedrink het, sal sy weet die Middelburg manne is, as die verdedigende Munga kampioene, gereed vir die uitdaging.
Wanneer die skoot in Bloemfontein klap, gaan die spanne vir liefdadigheid ry, maar onder die Care Riders se sitplekke gaan daar so ekstra woema wees, aangevuur deur tweeling sussies.
