Sy ID-boekie sê hy is 80, maar Danie Joubert het al klaar weer sommer by dié getal verbygedraf.
Joubert, ’n lid van die Midack-klub, het op sy dag 12 Comrades wedlope voltooi, die eerste in 1985 op 39-jarige ouderdom en die laaste een in 2013 toe hy 67 jaar oud was.
Hy het al meer as 150 parkruns gedoen en het dan sommer van sy huis af soontoe en terug gedraf.
• Al kan hy nie meer die Comrades hardloop nie, het hy net vir Januariemaand ’n totaal van 100.5km in Middelburg se strate kafgedraf!
• Die klublede van Midack wens hom ’n geseënde en gesonde lewensjaar toe. Hulle het op sy verjaardag vir hom balonne en eetgoed gegee toe hy getrou opgedaag het vir sy oefensessie op die pad saam met die klublede.
• Sy kinders en kleinkinders volg in sy voetspore en het Tobie van den Bergh onlangs berig oor ‘Joubert en Kie’ se prestasies.
