Twee egpare van Middelburg durf Sondag die Kaapse Fietstoer oor 109km aan.
Jurgens Steyn gaan saam met sy vrou Angelique die Kaapse Skiereiland verken, terwyl Riaan Janse van Vuren en Deseré sê hulle gaan beslis nie jaag nie, maar die Kaapse skoonheid indrink.

Ervare fietsryers, wat die ou Argus gery het, deesdae die Kaapse Fietstoer, kan nie uitgepraat raak oor veral die gedeelte by Chapman’s Peak nie, waar die Kaap sy mooiste voet voorsit.
Op ’n stadium ry deelnemers die pas af, met die oseaan wat neffens hulle wink.

Die Kaapstad Fietstoer, word erken as een van die wêreld se grootste tydgebonde massadeelname-fietsrygeleenthede en lok fietsryers van regoor die wêreld om die skoonheid van die Kaap op twee wiele te ervaar.
Daar was verlede jaar 28 000 deelnemers.

Die oud Hoërskool Middelburg personeellid, Magda Nieuwoudt, het haar fokus van driekamp af na fietsry geskuif en onmiddellik presteer. Sy het verrassend derde geëindig in die RideJoburg en gaan ook in die Kaap trap.
Dit sal interessant wees om te sien hoe vaar sy teen die meer ervare elite ryers.

*Oud HTS Middelburg leerling, Gustav Basson, neem nie deel nie. Hy vlieg Griekeland toe om aan die Grand Prix Rhodes wedren deel te neem en daarna in die Toer van Rhodes te jaag.