Padfietse en bergfietse pak mekaar in klubrit
Fietsryers kry kans om liefde te wys met paaseiers
Waar is al die roadies?
Die padfietse en MTB’s (bergfietse) pak mekaar more (14 Maart) in Middelburg Fietsryklub se maandelikse klubrit.
Daar word om 6:30 by B2 Fietsrywinkel weggespring, waar daar ook koffie en iets te ete sal wees. Dit is ook die eindpunt.
Bergfietse en Padfietse
Die eerste deelnemer terug verdien 20 punte vir sy span, tweede 15 punte, derde 10 punte en daarna vyf punte wanneer jy klaarmaak.
Die bergfietse ry 40km “tot by die grondpad wat myn toe gaan oor die N4 hoofweg, volg pad tot by brug by tolhek en terug”.
Die padfietse trap tot by Duvha Kragsentrale se stop en terug, wat sowat 50km is.
Tot dusver het 10 bergfietse aangedui dat hulle saamry en net drie padfietse.
- Vir navrae kan klubvoorsittter Johnny Smit by 079 812 0970 geskakel word.
“Easter Bunny”-wedren
*Nog fietsrynuus is dat daar op 28 Maart by Rooiwal naby Pretoria ’n “Easter Bunny”-wedren aangebied word.
Daar is afstande van 95km, 50km en 26km.
Organiseerder Lenie Smit sê “ons doen iets anders! Ry saam met ons fiets en bring paaseiers vir die minderbevoorregtes, bejaardes en kinders van die gemeenskap, sowel as die vriendelike beamptes wat ons fietsryers veilig hou. Kom geniet fietsry en doen iets goeds!”
Dit is ’n keuringsgeleentheid vir die RideJoburg 947.
