Vakansiegangers wat beplan het om die langnaweek by Mabalingwe naby Bela-Bela te spandeer, se vakansie is kortgeknip na ‘n verwoestende brand gister by die reservaat uitgebreek het.

Jeedee Cloete, Vryheidsfront Plus raadslid van Wyk 1, sê spanne werk sedert gistermiddag onverpoos om die vlamme te probeer blus. Die sterk wind bemoeilik die spanne se taak.

Talle huise het glo reeds in die slag gebly en daar is opdrag gegee dat die reservaat ontruim moet word.

Cloete sê dat dit hartseer is om soveel Gauteng motors van besoekers op die pad teë te kom.

Besighede en inwoners van Bela-Bela het blitsvinnig saamgespan om te help waar hulle kan en daar is ‘n bakkievrag kos, water en koeldrank geskenk om brandbestryders te help.