Middelburg-motorfietsryer sterf ná hy ‘Ek lewe’-lied aan vrou stuur
’n Bekende inwoner van Middelburg is gister in ’n ongeluk naby Groblersdal oorlede – slegs ure nadat hy ’n simboliese lied oor die lewe met sy vrou gedeel het.
Die gemeenskap is in skok ná die dood van Johan van Zyl (68). Sy vrou, Joey, vertel dat hy gisteroggend nog die lied ‘Ek Lewe’ (Koos Roos se weergawe van die bekende Anneli van Rooyen lied) vir haar gestuur het. Kort daarna het hy in ’n ongeluk op die R25, sowat 5 km buite Groblersdal, gesterf, berig die Middelburg Observer.
“Ek weet steeds nie presies wat gebeur het nie. Daar is soveel stories; party sê hy het ’n hartaanval gekry, ander sê hy het uitgeswaai vir ’n motor. Ek sien môre ’n polisieman van Groblersdal en dan sal ek dalk meer weet,” het Joey vanoggend gesê.
Die laaste rit
Volgens Joey het Johan gister saam met ’n groep vriende aan die ‘Snake Run’ deelgeneem. Hoewel hy nie aan ’n spesifieke motorfietsklub behoort het nie, het hy verlede jaar ’n Suzuki GSX-R 1000 gekoop en graag saam met ander motorfietsryers op dag-uitstappies gegaan.
Die groep het gister oggend saam ontbyt geëet voordat hulle op die N11-roete vertrek het. Later het hulle op die Bronkhorstspruitpad (R25) gery.
“Om 12:28 het sy vriend, Jaco (Bogart), my gebel en gesê Johan was in ’n ongeluk en hulle wag vir die ambulans,” onthou Joey. Sy wou dadelik na die toneel ry, maar Jaco het haar afgeraai om dit te doen. Slegs tien minute later, om 12:38, het die tweede noodlottige oproep gekom: Johan is oorlede.
’n Man van vrede
Joey het gister Johan se persoonlike besittings teruggekry. “Sy foon is heeltemal stukkend; ek dink dit was voor in sy sak.”
Sy beskryf haar man as ’n man van vrede wat selde sy humeur verloor het. “Ek het soms kwaad geword, juis omdat hy nie kwaad geword het nie!” Sy rustige geaardheid het hom geliefd gemaak in Middelburg en eMalahleni, waar die egpaar nege jaar lank getroud was.
Johan sou aan die einde van April as roetebeampte met sy motorfiets by die Loskop-maraton diens gedoen het.
Nalatenskap
Buiten sy vrou Joey en haar dogter Jané, word Johan oorleef deur sy ouers, Chris en Louise; sy kinders, Johan jnr en Christelle; vyf kleinkinders; sy susters, Louise, Tollie en Amie; en sy broer, Kobus.
Breaking news at your fingertips… Follow Caxton Network News on Facebook and join our WhatsApp channel.
Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.
Read original story on www.citizen.co.za
