Sonder enige ooggetuies om te vertel wat gebeur het, soek die Klerksdorp-polisie naarstiglik na inligting oor die dood van ‘n vrou wat gisteroggend met ernstige bytwonde gevind is.

Parys Gazette berig dat ‘n plaaslike inwoner het gisteroggend (5 Junie) omstreeks 05:45 op die lewelose liggaam van die onbekende vrou in Margaretha Prinsloo-straat afgekom en die polisie ontbied. Nooddienste was vinnig op die toneel, maar kon niks vir die vrou doen nie en het haar dood verklaar.

Volgens polisiewoordvoerder kolonel Adéle Myburgh het die oorledene verskeie duidelike bytwonde aan haar liggaam gehad. Die presiese omstandighede rondom die voorval is egter nog onduidelik.

Agt honde is kort ná die ontdekking by ’n nabygeleë erf aangetref en in die sorg van die DBV geplaas. Dié diere is intussen van kant gemaak.

Die polisie het ’n geregtelike doodsondersoek geopen en die ondersoek duur voort. Die vrou se identiteit kon tot op hede nie vasgestel word nie.

Dringende beroep op die publiek

As jy enige inligting het wat kan help met die ondersoek, of as jy kan bydra tot die identifisering van die oorledene, kontak asseblief die polisie deur een van die volgende kanale:

• Speurtakbevelvoerder (Klerksdorp): Kol. JC Scholtz by 082 578 0187
• Crime Stop (Anoniem): 08600 10111
• Alternatief: Rapporteer dit by jou naaste polisiekantoor of gebruik die MySAPS-toepassing.