’n 85-jarige pa van Bloemfontein staan nou tereg op ’n klag van moord nadat sy 56-jarige seun Maandagaand in die Pelonomi-hospitaal in Bloemfontein beswyk het aan ’n skietwond in sy nek.

Parys Gazette berig die oorledene, Erich Bruhns, was ’n sakeman van Bainsvlei.

Plaaslike polisiewoordvoerder Sersant Mahlomola Kareli het bevestig dat die klag van strafbare manslag na moord verander is ná die dood van die seun.

Kareli sê Bruhns is Saterdag in die hospitaal opgeneem nadat hy na bewering deur sy pa in Midhurstlaan geskiet is.

Die beskuldigde, Gert, is kort daarna in hegtenis geneem nadat hy na bewering van die toneel gevlug het.

Kareli sê daar is tydens die arrestasie naby die N1-hoofweg beslag gelê op ’n gelaaide vuurwapen met ekstra ammunisie.

Gert sal weer volgende Dinsdag voor die hof verskyn vir ’n formele borgaansoek.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.