Nooddienste en plaaslike sekuriteitsinstansies het gister omstreeks 08:09 na Raymondstraat in Risiville gejaag nadat ’n dringende oproep vir bystand op ’n plaaslike WhatsApp-groep geplaas is.

Verskeie rolspelers, insluitend CERT, Sekuriteit Sonder Grense, ER24 en CB EMS, het op die oproep gereageer. Met hul aankoms op die toneel het hulle die bejaarde man in ’n kritiek beseerde toestand aangetref. Hy het ernstige beserings aan sy keel opgedoen berig Vaalweekblad.

Nooddienswerkers het die man op die toneel gestabiliseer voordat hy per ambulans na ’n nabygeleë hospitaal gehaas is. Hy het egter weens die erns van sy beserings enkele ure later beswyk.

Die man se identiteit is aan Vaalweekblad bekend, maar sy naam word weerhou totdat alle naasbestaandes amptelik in kennis gestel is.

Hoewel die presiese omstandighede van die aanval nog ondersoek word, dui inligting van die toneel daarop dat die hond vermoedelik ’n Pitbull-terriër is wat aan die slagoffer se dogter behoort.

Die polisie het ’n geregtelike doodsondersoek geopen en ’n lykskouing sal gedoen word om die presiese oorsaak van dood te bepaal.

Teen die tyd van publikasie het nóg die Meyerton SAPD, nóg die Vereeniging SAPD op versoeke vir kommentaar gereageer.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.