Die Pacaltsdorp-speurtak ondersoek ’n saak van poging tot moord ná ’n 18-jarige seun op Sondag 6 September in Hoërskool Pacaltsdorp se koshuis in George aangerand is, berig die George Herald.

Videomateriaal van die voorval wys hoe die slagoffer na bewering deur ’n 21-jarige leerder van ’n bed afgetrek en herhaaldelik geslaan en geskop word. Terwyl ander leerders toekyk, lag en die voorval op selfoon verfilm. Die slagoffer word daarna na ’n ander kamer gesleep en op die vloer gelaat.

Daar word ook beweer dat die slagoffer die volgende oggend, Maandag 7 September, ’n spieël oor ’n ander seun se kop gebreek het.

Volgens adjudant-offisier Chris Spies, Suid-Kaapse polisiewoordvoerder, het die voorval omstreeks 20:00 plaasgevind toe die slagoffer na sy vriend se kamer gegaan het en ’n argument uitgebreek het.

“’n Voorlopige ondersoek is van stapel gestuur, wat daartoe gelei het dat ’n strafsaak aanhangig gemaak is,” het Spies gesê. “Die slagoffer is op Maandag 7 September na ’n plaaslike mediese fasiliteit geneem vir behandeling.”

Die polisie se ondersoek duur voort.

Na aanleiding van die voorval het ’n groep ontstoke inwoners gister (11 September) voor Hoërskool Pacaltsdorp byeengekom om deel te neem aan ’n vreedsame betoging teen boelies en geweld in skole.

Hoërskool Pacaltsdorp se skoolhoof, Clifton Titus, het bevestig dat albei betrokke seuns geskors is, maar dat hulle toegelaat sal word om die eksamen te skryf.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.