Leo, die leeu wat lief is vir melk en kaas, wat Maandagoggend uit sy hok by Mbidi Lodge ontsnap het, is veilig terugbesorg aan sy eienaars.

Nog voor sonop Maandag, het een van die personeellede van die lodge digby Loskopdam besef die hek van Leo se hok staan oop.

Hy het dadelik probeer kontak maak met bestuurder Frikkie Tolmay, maar weens swak sein kon hy hom nie in die hande kry nie.

Leo se spoor is gevat om te kyk in watter rigting hy gestap het.

Intussen het die besturende direkteur van De Wagendrift Boerdery, Pieter Nel, vir Tolmay gekontak om hom te laat weet dat een van sy werknemers ’n leeu langs die lyndraad gesien het.

Tolmay het die personeellid van die lodge, wat op die leeu se spoor was, geskakel en daar is vasgestel dat Leo by die ingang van die boerdery is. Veearts dr. Andrew Baker het hom na die toneel gehaas.

Nel en ‘n personeellid van die boerdery, Andrew Barker, het hulle bakkies langs Leo parkeer, wat ewe bedees die omgewing bekyk het. Die pad is ook aan beide kante versper om te voorkom dat enige verkeer die leeu steur.

Nadat Leo verdoof is, is hy deur die De Wagendrift-bestuur en werkers op ’n voertuig gelaai en terugvervoer na Mbidi Lodge.

Die grendel waarmee die hek van sy hok toegemaak word het geknak, waarskynlik weens verwering, aangesien hierdie een van die eerste hokke op die lodge is.

Intussen het Mbidi al die hokke se hekke nagegaan om te verseker dat soortgelyke voorvalle nie plaasvind nie.

Leo is handgrootgemaak en het ’n baie liefdevolle geaardheid.

In ’n verklaring ná die voorval, het Nel sy dankbaarheid uitgespreek vir die vinnige reaksie, optrede en samewerking van die plaaswerkers en die veearts.