Kyk: Koedoes maak amok in Middelburg-woonbuurt
Twee koedoes het inwoners van Kanonkop behoorlik laat bontstaan nadat hulle deur strate gehardloop en een selfs deur ’n huis se sitkamervenster gebars het.
Twee koedoes het inwoners van Kanonkop in Middelburg, Mpumalanga, al sedert vanoggend 03:00 uit die vere.
Middelburg Observer berig die grootste van die twee, ’n jong bul, is vanmiddag deur dr. Munnik Hertzog gepyl en veilig in ’n wildswa gelaai. Die tweede een, ’n jong kalf, is ‘n straat verder verdoof. Die koedoes sal later in die Loskopdam-natuurreservaat vrygelaat word.
Die nuus van die koedoes in die omgewing is vroegoggend op ’n WhatsApp-groep gedeel. Die koedoe-bul en -kalf is egter van mekaar geskei nadat lede van die Dagpatrollie die bokke probeer inperk het. Mure en palissadeheinings kon die diere egter nie keer nie.
Die bul is uiteindelik in die sitkamer van ’n huis in Broodboomstraat gepyl. Hy het weens die skok deur ’n ruit gebars. Hy het later deur dieselfde ruit geklim, waarna die verdowing in die oprit ingeskop het. Hertzog het die bok met die hulp van omstanders grond toe gebring en na die wildswaentjie gedra, waar die koedoe weer bygebring is.
Groot skade is in die huis van Koekie van Wyk aangerig. Van Wyk was reeds met haar versekeraars in kontak. Die glasmense was nog voor Hertzog op die toneel, maar moes onverrigter sake omdraai omdat die koedoe toe nog in die huis was.
Bloedvlekke is regdeur die huis opgemerk waar die bok beweeg het. Die koedoebul het snye opgedoen toe hy deur die ruit is, maar Hertzog het bevestig dat die wonde oppervlakkig is. Hy het ook reeds antibiotika en ander nodige behandeling aan die diere toegedien.
Die kleiner bok het homself tuisgemaak tussen ’n boot en ’n voertuig onder ’n afdak in Tambotiestraat.
Verskeie rolspelers het ingespring om te help. Dynamicx Drones het hulp vanuit die lug verleen om die bokke op te spoor. Midwit Diesel en Olie het die dieselkoste gedek van hulpverleners soos Piet Wassenaar, die bekende wildshanteerder en slangvanger van eMalahleni.
Die bokkie is, nadat hy gepyl is, weer af rivier se kant toe waar hy eindelaaste gelaai is.
Die koedoes sal nou eers in kwarantyn geplaas word om vas te stel of hulle bek-en-klouseer het voordat hulle vrygelaat word.
Kyk die video’s:
Waarskuwing: Die video hieronder bevat grafiese inhoud wat sensitiewe kykers kan ontstel
Breaking news at your fingertips… Follow Caxton Network News on Facebook and join our WhatsApp channel.
Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.
Read original story on www.citizen.co.za
