Langer as ’n dekade nadat Marietjie Prinsloo tot 25 jaar tronkstraf gevonnis is vir haar rol in een van Suid-Afrika se grootste beleggingsbedrogspul, is daar nuwe vrae oor wanneer sy vir parool oorweeg kan word, berig Vaalweekblad.

Prinsloo, wat tydens die Krion-skandaal as die ‘Engel van Vanderbijlpark’ bekendgestaan het, is in Oktober 2010 gevonnis nadat sy op meer as 118 000 aanklagte skuldig bevind is.

Die beleggingskema, wat onder verskeie name, waaronder MP Finance Consultants en Krion Financial Services bedryf is, het duisende beleggers gelok. Luidens hofstukke is daar sowat R1,5 miljard in die verskillende skemas belê.

Prinsloo het beleggers hoë opbrengste belowe, maar die ondersoek en daaropvolgende hofverrigtinge het getoon dat dit ’n onwettige beleggingskema was waarin geld van nuwe beleggers gebruik is om bestaande beleggers te betaal.

Die skema het in die laat 1990’s in Vanderbijlpark ontstaan en het later na ander dele van die land uitgebrei. Dit het in 2002 in duie gestort.

Prinsloo is in totaal tot meer as 29 000 jaar tronkstraf gevonnis, maar die individuele vonnisse is gelas om gelyktydig uitgedien te word.

Die Hooggeregshof van Appèl het in Desember 2015 die skuldigbevindings en vonnisse gehandhaaf.

Die saak het ook tot ’n groot belastingdispuut gelei. Die Appèlhof het bevind dat inkomste wat uit die onwettige skema verkry is, steeds aan belasting onderhewig kon wees. SARS het honderde miljoene rand van die boedel geëis.

Daar is intussen berigte dat Prinsloo moontlik in 2028 vir parool oorweeg kan word. Dié datum kon egter nie onafhanklik aan ’n openbare verklaring van die Departement van Korrektiewe Dienste gekoppel word nie.

Parooloorweging beteken ook nie outomaties dat ’n gevangene vrygelaat gaan word nie. Die toepaslike Korrektiewe Toesig- en Paroolraad moet eers die saak oorweeg voordat ’n besluit oor parool geneem word.

Die presiese datum waarop Prinsloo vir parool oorweeg kan word, sal deur die Departement van Korrektiewe Dienste bevestig word.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.