Opgeveil: Ikoniese Grey Kollege-geboue uit Lego-blokkies

Die jaarlikse Tommix Rugbymanneaand het vanjaar ’n ‘speelse element’ gehad toe Lego-modelle van Grey Kollege se erfenisgeboue ten bate van die skool se rugbyprogram opgeveil is.

Bloemfontein Courant berig die geleentheid verlede Donderdag, waar meer as 400 gaste met ’n liefde vir Grey Kollege se rugbytradisie byeen was, is aangebied op die vooraand van die Paul Roos-interskolenaweek. Lego-modelle van die skool se hoofgebou, snoepwinkel en Andrew Murray-huis is spesiaal vir die veiling geskep. Die geld wat deur die veiling ingesamel is, is ten bate van die skool se rugbyprogram.

“Die bedrag is nie so belangrik soos elke persoon wat die aand bywoon nie,” sê Robert Ebersohn van Tommix Rugby. “Want sonder Greyrugbyliefhebbers is daar nie wenners nie.”

Tommix Rugby, ’n strategiese vennoot van Grey Kollege, ondersteun die skool op verskeie maniere. Die taak om die ikoniese geboue in Lego-vorm na te bou, was die verantwoordelikheid van Leon Mentz en sy vrou, Charlotte Scott-Mentz, van Piece Together, ’n onderneming wat spesialiseer in die verkoop van Lego.

“Robert het my genader met die idee,” vertel Mentz. Die konsep het ontstaan toe Ebersohn en sy kinders met Lego gespeel het. “Ek en my vrou het die geboue deeglik bestudeer en foto’s geneem,” sê Mentz. “Ons het die foto’s gedruk en teen ons studio se mure opgesit.”

Die beplanning het meer as ’n maand geduur voordat die bouproses begin het. “Ons het aanvanklik met ’n paar idees geëksperimenteer om te bepaal wat binne ’n realistiese skaal en kosteraamwerk moontlik is,” sê Mentz.

Die modelle, wat uit ongeveer 25 000 Lego-blokkies bestaan, het meer as 200 uur se bouwerk vereis.

“Al die fondse word aangewend om rugbyspesifieke uitgawes by Grey Kollege te dek, sodat ons seuns hul volle rugbypotensiaal as skoolseuns kan bereik,” sê Ebersohn. “Ons bestee die kapitaal aan gehalteafrigters en nuwetegnologie-rugbytoerusting om ons seuns te ontwikkel.”

Hy wys ook daarop dat dit ’n geldelike las vir ouers inhou om na rugbywedstryde in ander sentra te reis. “Dit is moeilik vir ouers om vir rugbywedstryde te reis,” sê hy. “Monument in Krugersdorp is amper die naaste wedstryd, en dit word ’n las vir ouers. Ons probeer dié las van Tommix se kant verlig.”

Ebersohn het alle betrokkenes bedank vir hul bydraes, en die publiek uitgenooi om dop te hou wanneer daar weer nuus is oor volgende jaar se Tommix Rugbymanneaand.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.