Vier verdagtes is in hegtenis geneem in verband met Saterdag se skietery by ‘n kroeg in Orkney, Noordwes. Dit volg nadat agt mense dood en 13 beseer is toe daar in die kroeg losgebrand is.

Brigadier Sabata Mokgwabone, ‘n polisiewoordvoerder, sê vier verdagtes is in hegtenis geneem en een verdagte is nog nie opgespoor nie.

“Vier verdagtes wat almal buitelandse burgers is, tussen 24 en 38 jaar oud, is onderskeidelik in Klerksdorp en Kanana-township in hegtenis geneem. Tydens die arrestasies het die span beslag gelê op ‘n Toyota Hilux dubbelkajuitbakkie en meer as 82 rondtes ammunisie van verskillende kalibers.”

Die verdagtes sal more in die Orkney-landdroshof op agt aanklagte van moord, 13 aanklagte van poging tot moord, asook die onwettige besit van ammunisie verskyn.