’n Drama het gistermiddag op die R59 net buite Parys tussen die vliegveld en die ingang na die Parys Golf & Country Estate afgespeel met ’n skietery tydens ’n konfrontasie tussen verdagtes en die polisie.

Parys Gazette berig dat polisiewoordvoerder Kaptein Loraine Earle bevestig het dat een verdagte tydens die voorval noodlottig gewond is, en ’n ander op die toneel gearresteer is.

Daar is ook bevestig dat die Onafhanklike Polisieondersoekdirektoraat die ondersoek ná die voorval lei. Meer besonderhede sal in die Gazette geplaas word sodra die amptelike polisieverklaring uitgereik is.

’n Motoris wat op voorwaarde van anonimiteit met die Gazette gesels het, het vertel dat hulle van ’n begrafnis op pad terug na Parys was toe hulle verby die misdaadtoneel is ná 13:00.

“Daar was baie polisiebeamptes en verkeersbeamptes op die toneel en ’n polisiehelikopter in die lug. Die pad was vir verkeer gesluit en is vir ons gesê dat dit ’n misdaadtoneel is.”

WhatsApp-groepe het behoorlik gegons oor die gebeure. Mense is aanvanklik aangeraai om alternatiewe roetes te volg, maar die pad is later weer oopgestel vir verkeer.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.