Video: George-vrou se moordenaars wys middelvingers vir familie ná vonnisoplegging
Joan Singrew se man en sy neef is vandag in George gevonnis vir haar moord in November 2024.
Asof die grusame moord op hulle ma nie reeds ondraaglik was nie, is die familie van Joan Singrew verder gekrenk toe haar moordenaars ná hulle vonnis middelvingers in hul rigting wys terwyl hulle na die hofselle onder die rondgaande hooggeregshof in George gelei is.
George Herald berig dat Duane Singrew (47) tot lewenslange tronkstraf gevonnis is, terwyl Heinrich Jumat (46) 20 jaar tronkstraf opgelê is.
Terwyl regter André le Grange die vonnis voorgelees het, het Singrew van tyd tot tyd gesigte getrek, sy wenkbroue gelig en sy skouers opgetrek. By tye het dit voorgekom asof hy ’n byna traak-my-nie-agtige houding inneem, wat skerp gekontrasteer het met die erns van die verrigtinge.
Kort voor vanoggend se hofverrigtinge begin het, is ’n man uit die rondgaande hooggeregshof verwyder nadat hy betrap is toe hy ’n verdagte pakkie, vermoedelik dagga, aan Jumat in die beskuldigingsbank oorhandig het.
’n Hofordonnans het die oorhandiging opgemerk en die verdagte onmiddellik na die hofselle onder die hof geneem.
Dit was nie onmiddellik duidelik of Jumat ’n bykomende klag in die gesig sal staar nie, aangesien die pakkie in sy besit gevind is.
Die voorval het egter ernstige vrae laat ontstaan oor die doeltreffendheid van sekuriteit by die hof. Lede van die publiek moet by die ingang deur ’n metaaldetektor beweeg en hul sakke word deursoek, wat die insident meer kommerwekkend maak.
Buite die hof het gemeenskapslede gebid.
Kyk die video:
Die moord
George Herald het voorheen berig dat Joan op 21 November 2024 vermoor is. Haar liggaam is enkele dae later, op 25 November, wat haar 54ste verjaarsdag sou wees, in ’n beboste gebied naby Charlesstraat in Groot-Brakrivier gevind.
Beeldmateriaal van 21 November 2024, die dag van Singrew se verdwyning, wys ’n wit Ford Figo buite die oorledene se woning in Rosemoor, omstreeks 10:36. Later dieselfde dag was die voertuig op pad na die gebied waar haar liggaam gevind is, en daarna weer op pad terug, voordat dit in die rigting van die N2 vertrek het.
’n Bloedspatselkenner en forensiese ontleder van die polisie het getuig dat bloedspore, moontlik van ou of skoongemaakte bloed, in die Singrew-woning sowel as in die Ford Figo gevind is.
Die staatsaanklaer, advokaat Evadne Kortje, het in haar slotbetoë aangevoer dat Jumat waarskynlik in die voertuig voor die woning gewag het terwyl ’n konfrontasie tussen Singrew en die oorledene binne die huis plaasgevind het, waartydens sy vermoor is.
Daarna is die voertuig na bewering na die agterkant van die huis verskuif, waar die liggaam uit die woning verwyder en in die kattebak gelaai is.
Hoewel die staat erken het dat die moord moontlik in die hitte van die oomblik plaasgevind het, is daar betoog dat die beskuldigdes se optrede op voorbedagte rade gedui het. Volgens die staat het Singrew geweet dat die oorledene van plan was om ’n klag teen hom by die polisie in te dien, en dat hy doelbewus opgetree het om dit te verhoed.
Jumat het verkies om nie te getuig nie.
Breaking news at your fingertips… Follow Caxton Network News on Facebook and join our WhatsApp channel.
Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.
Read original story on www.georgeherald.com
