Lugujwe ngendumezulu yomcimbi usuku lwamaSiko eNquthu
Amasiko angamagugu angasoze aphela empulweni yomuntu.
Bekushikisha ufudu kumaqembu ezigodi ezahlukene ezingamele indawo yaseNquthu njengoba ebenandisa kumcimbi wokugubha amasiko obuhlelwe uMnyango wezokuNcebeleka kumasipala wakuleyandawo nobubanjelwe ehhola i-V.A Makhoba khona eNquthu. Afike ngobuningi ehlobe eqhakazile ngokwamasiko awo ubungafunga ukuthi umshado.
Nakuba umcimbi ungaqalanga ngesikhathi okuphawulekile ukuthi amakhosi awakwazanga ukuphumelela, kodwa ahlonishwe ngesizotha. Amaqembu iwona abegcwele kulomcimbi ukudlula umphakathi obuthamele.
UMeya EN Molefe uphawule wathi, “Ukugubha usuku lwamasiko kubalulekile ngoba kukhuthaza abantu ngokugcinwa kwamagugu abo.”
Ubale amagugu okuhlonipha, ukuziphatha kahle komama nobaba nathe kugcina kuyisibonelo esihle ebantwaneni. Uphinde wabalula ukugcinwa kwentombi nensizwa athe kuyigugu elikhulu kulelizwe esiphila kulo.
UMeya uphawule wathi nakuba inyanga yamasiko isindlulile kodwa ‘amasiko namagugu akudluli empilweni yomuntu’. UMeya uphinde wathi angakujabulela ukuthi ngeminyaka ezayo makugujwa lolusuku kufakwe nalaba bokufika ‘esesiphila nabo manje ezindaweni njengama China, abase Zimbabwe kanye nabase Nigeria’. Mnuz MB Jiyane, ophethe kuMnyango wezokuXhumana kumasipala wase Nquthu uqinisekise uMeya ukuba isicelo sakhe sizolandelelwa.
UDimakatso Tsotetsi ongumsunguli weqembu ‘iBana Batsoseletso’ okuyiqembu eladla umhlanganiso kumqhudelwano kazwelonke eThekwini. Uthe uhlanganisa amantombazanyana akhe ngenhloso yokuba avikeleke ezintweni ezingezinhle ezenzeka ezweni kulesikhathi samanje.
Abebethamele lomcimbi singabala, uNksz Mazibuko, onguNdlunkulu waseSandlwana, Nksz Khanyile, ophethe isibhedlela i-CJM sakhona eNquthu kanye nabanye.
