Frances blink uit in XCM Challenge
Die wedren is berug vir baie harde en lang klimme en lang tegniese gedeeltes en het beslis nie in daardie opsig teleurgestel nie.
Uitgereik deur Vryheid Bergfietsryklub
HIERDIE pas afgelope naweek het vyf van ons bergfietsryers op Barberton in Mpumalanga gaan deelneem aan die XCM Challenge aangebied deur die Rotary Club. Die wedloop bestaan uit 20km, 30km, 48km, 77km en 105km afstande. Die wedren is berug vir baie harde en lang klimme en lang tegniese gedeeltes en het beslis nie in daardie opsig teleurgestel nie.
Riaan Swanepoel het aan die 105km afstand deelgeneem en baie goed gery. Lize Swanepoel, Frances Janse van Rensburg (16) en Ernest Franzen (18) het in die 48km deelgeneem en baie goed gery ten spyte van tegniese uitdagings voor die wedren. Frances moes ‘n nuwe band laat opsit net minute voor die wedren en Ernest se fiets se band het ook probleme tydens die wedren gegee. Ten spyte daarvan het Frances 2de vrou algeheel geëindig en Ernest ook baie goed gery. Lize was 2de in haar ouderdomskategorie. Ons is baie trots op Frances, sy is maar net 16 en vaar uitstekend in haar wedrenne en veral in hierdie groot wedren waar daar meer as ‘n duisend deelnemers oor die vyf afstande was.
Jabulani Xulu, ons dokter in die groep, het deelgeneem aan die 77km wedren. Vroeg in sy wedloop het hy gehelp om ‘n medefietsryer medies te behandel wat ‘n hartaanval gehad het en kort daarna is sy wedren ook gekelder deurdat hy ‘n harde val gehad het en sy sleutelbeen gebreek het. Jammer, Jabu. Hoop jy sterk gou aan.
