Munisipale verval is aan die orde van die dag en plaaslike vullisstortingsterreine is net ‘n voorbeeld hiervan. Dit is die mening van die burgerregte organisasie, AfriForum wat jaarliks vullisterreine landwyd oudit om die toestand van munisipale en private vullisterreine in Suid-Afrika te bepaal. Die organisasie se volledige vullisterreinouditverslag word later vanjaar bekendgemaak.

AfriForum het egter gesê sy oudit wys dat die toestand van Ngwathe se vullisstortingsterreine, spesifiek in Parys en Heilbron weer vanjaar ooglopend swak was. “Benewens dat beide stortingsterreine nie oor wettige lisensies beskik of behoorlik omhein is nie, besoedel die afval klaarblyklik die nabygeleë waterbronne en loop diere rond en vreet die onwelriekende vullis,” sê die organisasie.

AfriForum sê in ‘n verklaring hy het ‘n skrywe in die verband aan die Ngwathe munispialiteit gerig en versoek dat stappe geneem word om die toestand by dié stortingsterreine te verbeter.

AfriForum wag steeds op uitspraak van sy dringende aansoek tot die Bloemfonteinse Hooggeregshof wat in Desember gebring is en waarin intervensie by die Ngwathe Plaaslike Munisipaliteit ingevolge artikel 139 van die Grondwet versoek is. Hiervolgens kan ’n provinsiale uitvoerende gesag intree en die munisipaliteit onder administrasie plaas as ‘n munisipaliteit nie sy pligte nakom nie.