Sy is net twee jaar oud, maar dié nuwe lid van die polisie se K9-eenheid in Kroonstad het groot pootspore om vol te staan – dié van haar legendariese voorganger Benji.

Soos Benji is Lady ‘n opgeleide biologiese vloeistof-opsporingshond, wat sy-aan-sy saam met adjudant-offisier Leon Strydom sal werk na die dood van Benji wat oor die Vrystaat bekend was vir sy merkwaardige vermoë om fynspore van biologiese vloeistowwe – soos bloed en semen – op misdaadtonele op te spoor.

Benji is in Oktober 2023 met klierkanker gediagnoseer en is hy oorlede.

Die wit-en-bruin border collie met sy deurdringende blou oë, was vir tien jaar ‘n legende in die Suid-Afrikaanse Polisiediens.  In sommige gevalle was Benji se bevindings die enigste beskikbare bewyse wat gelei het tot suksesvolle skuldigbevindings in sake van moord, verkragting en ander ernstige misdade. Dit danksy sy uitstekende bio-speurvernuf wat ondersoekers dikwels gehelp het om noodsaaklike DNA-bewyse te kon kry.

Benji se werk het hom selfs oor grense geneem. Saam met Strydom, is hy onder meer opgeroep om die Swazilandse Polisie te help in ‘n ingewikkelde moordondersoek waarin ‘n polisiebeampte ‘n kollega vermoor en die liggaam versteek het. Danksy Benji se vermoë, het geregtigheid geseëvier.

Benji was oorspronklik as geskenk deur Strydom se dogters aan hom gegee toe hy agt weke oud was.  Uiteindelik het hy een van die SAPD se mees vertroude viervoetige speurders geword het.

Sy dood het ’n diep leemte by sy hanteerder en kollegas regoor die Vrystaat gelaat. “Hy was my kollega, my vriend, my kind,” het Strydom gesê. “Hy het gevaarlike misdadigers uit ons gemeenskappe verwyder en ’n werklike verskil gemaak, veral in sake waar kinders betrokke was.”

Vasbeslote om Benji se nalatenskap voort te sit, het Strydom in Oktober 2024 begin soek na ‘n waardige opvolger. Met die ondersteuning van die Kroonstad-gemeenskap, wat hul plaaslike K9-eenheid hoog ag, het Strydom op Lady,  ‘n Belgiese Malinois afgekom.

Sy is aan die SAPD geskenk om as Bio-hond opgelei te word. In Junie 2025 voltooi sy haar opleiding en slaag amptelik as ten volle opgeleide biologiese vloeistof-speurhond.

Met Lady aan sy sy, is Strydom gereed om die stryd teen ernstige misdaad voort te sit, en wil dié twee die standaard van uitnemendheid wat Benji gestel het, handhaaf.