Amot blom vir prys in tuinekompetisie
Amot is in 2023 ook met 'n prys beloon toe dié tehuis 'n derde plek met die tuinekompetisie verower het, vertel matrone Teresa Broodryk. 'n Trotse prestasie wat net moontlik is danksy die toewyding en geesdrif van die inwoners en tehuispersoneel.
Nie eens die uitdaging met min water vir tuinmaak keer Amot se inwoners en personeel om mooi te maak met hart en siel nie. Die kleurvolle en kreatiewe tuine wat jy by dié tehuis sien, het gesorg dat Amot weer vanjaar onder die wenners van Ons Tuis se 2025 Woeker en Werk-Tuinekompetisie is.
Die kompetisie, wat einde 2023 die eerste keer bekendgestel is, is vanjaar landwyd oopgestel vir inskrywings, en het bejaarde residensiële fasiliteite van regoor Suid-Afrika die geleentheid verwelkom om deel te neem.
Vanjaar se inskrywings is deur die internasionaal bekende landskapontwerper Leon Kluge beoordeel. Kluge is bekend vir sy uitsonderlike bydraes tot tuinontwerp, en het hy die span gelei wat die RHS Chelsea Blommeskou in Londen in 2025 gewen het.
Met die beoordeling is gekyk na ontwerp en kreatiwiteit, plantkeuse en kleurskemas, watergebruik en volhoubaarheid, ruimtebenutting en indeling, asook netheid en die algehele indruk. Kluge was beïndruk met dit wat elke deelnemende tehuis kon regkry veral die waterwyse plantgebruik by Amot wat hy as prakties en sag op die oog beskryf het.
