Dit sous behoorlik van gister af in Parys en is bykans 30mm reën sedert gister tot vanmiddag in die dorp gemeet  Op plekke selfs 40mm – en dit reën steeds.

Die weerdiens voorspel maksimum temperature van in die lae twintigs tot minstens volgende Sondag.

Nog reën kan ook in Parys verwag word van Woensdag tot Sondag.

Motoriste word gewaarsku om wanneer jy op die pad gaan, spoed te verminder en volgafstande te hou in die nat weer. Wees ook baie bedag op slaggate wat ‘n groot gevaar skep veral op die R59 tussen die N1 en Parys, en tussen Parys en Vredefort. Duskant Vredefort in die rigting van Kroonstad is ook slegte slaggate.

Gister is reeds gewaarsku oor die R720 tussen Koppies en Edenville wat telkens met die reën, bykans onbegaanbaar is. Verskeie voertuie en veral swaar voertuie wat die roete ry, het reeds vasgeval.

Wees ook bedag op ‘n boom wat vanmiddag in Parys in Derdelaan oor ‘n gedeelte van die pad geval het.

Vaaldam is nou 100,5% vol met invloei wat vanoggend vroeg gemeet is teen 83,25 kubieke meter per sekonde, en uitvloei op 114 kubieke meter per sekonde.

Bloemhofdam staan nou op 93%en is water vanoggenduitgelaat op 31,284 kubieke meter per sekonde.