Heilbron sal ná die munisipale verkiesing in November deel wees van die Metsimaholo Plaaslike Munisipaliteit, en nie meer die Ngwathe Plaaslike Munisipaliteit nie. Gevolglik sal Heilbron-kiesers onder Metsimaholo-wyke registreer, en is Heilbron-inwoners aangeraai om die Metsimaholo OVK-kantoor te kontak vir inligting rakende stemlokale.

Die Ngwathe jurisdiksie gebied sal dan net die dorpe Parys, Vredefort, Edenville en Koppies insluit. Die bevestiging is deur die Munisipale Afbakeningsraad (MDB) gegee.

Verandering van wyksnommers:

As gevolg van die inlywing van Heilbron by Metsimaholo, verander die aantal wyke in Ngwathe, wat beteken wyksnommers in Ngwathe het verander.

Stemlokale

Parys stadsaal is nie ‘n stemlokaal vir die komende munisipale verkiesing nie. Kiesers wat voorheen hier geregistreer en gestem het, sal nou by Hoërskool Parys registreer en stem. Belangrik is egter dat die verandering van wyksnommers en stemlokale nie kiesers se registrasiestatus beïnvloed nie.
In ‘n munisipale verkiesing kan jy slegs stem by die lokaal waar jy geregistreer is.

Wie moet registreer?

Kiesers wat nog nie voorheen geregistreer het nie, of sedert die laaste verkiesing van adres verander het, moet seker maak dat hul wel vir die komende verkiesing geregistreer is.
Maak seker of jy geregistreer is

As jy twyfel of jy as kieser geregistreer is vir die verkiesing, kan jy jou registrasiestatus nagaan by registertovote.elections.org.za, jou plaaslike OVK-kantoor gedurende kantoorure by die Forum gebou besoek, die OVK se webtuiste volg by www.elections.org.za, of jou ID-nommer SMS na 31810. Jy kan ook tydens die registrasienaweek, 20-21 Junie, by jou stemlokaal gaan seker maak of jy wel geregistreer is. Stemlokale sal die naweek oop wees van 08:00-17:00.