Vrystaatse gesin in hof vir beweerde dieselbedrog
Die vier sal weer op 16 September voor die hof verskyn.
Pieter Smit (63), sy vrou Elizabeth (62), asook hul seuns Marnu (32) en Estean Smit (30), is Maandag op borgtog van R5 000 elk vrygelaat kort nadat hulle dieselfde dag in hegtenis geneem is op aanklagte van bedrog, diefstal en geldwassery.
Volgens die klagstaat het hulle glo ‘n onderneming wat diesel aan boere verskaf met R940 000 oor ‘n tydperk bedrieg.
Valke-woordvoerder Luitenant-kolonel Zweli Mohobeleli sê die klaer het in September 2021 die R700 Truck Stop in Hoopstad vir ongeveer R1,7m gekoop. Smit Sr en sy seuns was na die verkooptransaksie verantwoordelik vir die bedryf van die onderneming.
Die nuwe eienaar het egter agterdogtig geraak nadat die onderneming nie winsgewend was nie.
‘n Ondersoek het toe gevind dat meer as R900 000 glo onregmatig bekom is deur fondse wat tussen verskillende bankrekeninge geskuif is, insluitend ’n rekening van Landboudienste Diesel (Edms.) Bpk. ’n maatskappy waarvan een van die seuns ’n direkteur is.
Die saak is by die Valke se Ernstige Kommersiële Misdaad-ondersoekeenheid in Welkom aangemeld.
Dit het daartoe gelei dat lasbriewe vir die beskuldigdes uitgereik is.
Die volgende hofverskyning is op 16 September wanneer die beskuldigdes na verwagting in die Gespesialiseerde Kommersiële Misdaadhof in Bloemfontein sal verskyn.
