Lukas het ‘n mediese toestand wat volgens spesialiste onverklaarbaar is en ook die rede dat hulle uit Potchefstroom na Johannesburg moes verhuis.
Lukas (2) is op 20 Januarie 2015 in Potchefstroom gebore en was ‘n normale en gesonde baba.
Hy was ‘n voltermyn-baba en het 3.7 kg geweeg. Met Lukas se roetine ondersoek op ses weke, het ‘n sonar getoon dat hy bloeding op die brein het.

Van toe af het hy begin om agteruit te gaan. Hy is al gehospitaliseer vir verskeie redes, waaronder bloeding en vog op die brein, longontsteking, varkgriep, virale infeksies, koksaki virus en verskeie ander ondersoeke wat X-strale, breinskanderings en ‘n “lumber punch” vereis het.
Hy sukkel ook om asem te haal en het ‘n onderontwikkelde lugweg.

Hy is later gediagnoseer met laringomalasie wat, saam met die varkgriep en ander virusse veroorsaak het dat hy van 20 April tot 22 Mei 2015 in die hospitaal moes deurbring. Hoewel Lukas die eerste jaar van sy lewe amper permanent in die hospitaal deurgebring het, probeer hy ook om die mooi dinge in die lewe te geniet. Hy is mal oor musiek en hou daarvan om agter sy bal aan te kruip, aangesien hy nog nie, soos ander tweejariges, kan rondhardloop nie. Lukas is baie vatbaar vir virale infeksies en moet voltyds na omgesien word. “Ek moes my werk bedank aangesien die risiko te groot is om hom kleuterskool toe te stuur,” sê Janine.

Lukas en sy ouers, Koos en Janine Etsebeth. Foto: Verskaf

Lukas kan nog nie kruip, loop of praat nie en is op sy tweede verjaarsdag gediagnoseer met permanente gestremdheid en hoewel sy fisioterapeut glo dat hy eendag sal kan loop, dit wel baie lank gaan neem.

Lukas se spraak en sig is ook aangetas en hy sal in die toekoms gereelde intensiewe bystand vanaf neurologiese fisioterapeute, arbeidsterapeute, spraakterapeute en dieetkundiges moet kry.
“Lukas se mediese toestand word beskryf as ‘n interessante geval en ‘n uitdaging om die regte diagnose te kan vind. Die dokters by een van die top hospitale in Johannesburg sê dat hy ’n regte wonderwerk is en dat ons dankbaar moet wees dat hy nog met ons is,” sê Janine. Vir meer inligting oor hoe om die gesin te ondersteun of vir enige skenkings om te help met die mediese kostes, skakel Janine by 084 240 6486.

Lukas se vordering kan ook op sy facebookblad gevolg word by die volgende skakel: https://m.facebook.com/story.php?story_fbid=1452787171433233&id=100001058916550