Van der Westhuizen bly in die Edge of the Vaal-landgoed op die oewer van die Vaalrivier oorkant Stonehaven, en het Maandag sy Seabreacher Z-model Killerwhale vir sy derde rit op die rivier geneem.
Maar met die baie reën van die afgelope paar weke was die water vuil met heelwat stompe en opdrifsels en is die boot toe deur Jan Publiek aangesien as ’n “moordvis”of selfs “reuse krokodil”.
Van der Westhuizen se onderneming voer die toertjiebote wat in die vorm van vereskeie seegediertes van witdoodshaaie tot dolfyne kom, in van die VSA. Die bote kan duik, spring en drie-as-draaie maak.
Jy moet ’n  standaard skipperslisensie hê om die bote wat as semi-duiboot-vaartuie erken word, te kan ry. Die bote word meestal met die loods se voete beheer.
Só ’n speelding kan jou sowat R1,6 miljoen kos en bote word volgens die kliënt se behoeftes gemaak. Van der Westhuizen se moordvis-boot kan 85km/h bo die water ry en sowat 45km/h onder die water op ’n  diepte van tussen een en twee meter.