Feathers Voëlklub sien uit na die besoek van Lukas Niemand, bekende ekoloog van Potchefstroom. Hy sal Donderdag, 31 Maart om 18:30 in die Sally Martin Park saal kom praat. Lukas het pas teruggekeer van ‘n maandlange besoek aan Marion-eiland, en sal sy ondervinding met die klub deel. Hy het baie avifauna konsultasiewerk gedoen in Oos- en Wes-Afrika. Lukas het ook meer as 810 voëlspesies in suidelike Afrika geïdentifiseer. Almal wat belangstel is baie welkom om die praatjie by te woon.
Die Feathers Voëlklub reël Saterdag, 2 April ook ‘n voëlkyk-uitstappie na Breathe River Retreat & Lodge, 17 km buite Parys.
Die groep kom om 06:30 by die PnP parkeerterrein bymekaar. Elkeen bring sy eie piekniekmandjie. Onthou jou kamera, verkyker en sonhoed. ‘n Voëlboek sal ook handig wees. Vir meer inligting, skakel Hansie Bekker by (056) 811 4754 of 082 820 4306, of Peter Killian by 083 625 8100.
