Brandweervoertuig tref bees onderweg na huisbrand
Die identiteit van die twee persone wat in die huisbrand omgekom het, is nie bekendgemaak nie.
Twee brandweerbeamptes van die Ngwathe Plaaslike Munisipaliteit is in ‘n stabiele toestand in die Emfuleni Medi Clinic nadat die Toyota Land Cruiser waarmee hulle Donderdagaand onderweg was na ‘n huisbrand in die Mokwallo-woonburt by Vredefort, ‘n rondloper bees getref het. Die ongeluk het op die R59 net buite Vredefort gebeur.
Die bees is op die toneel dood en is die voertuig erg beskadig.
Daar is ‘n geruime tyd al ernstige kommer oor die toestand van die R59 tussen Parys en Vredefort met groot en diep slaggate, en skep rondloper diere ‘n selfs nog groter gevaar op dié pad veral saans wanneer sig sleg is.
Twee mense wat in die sinkhuis gebly het, het in die brand gesterf. Na verneem word was dit ‘n man en sy vriendin wat in die brand omgekom het.
Omstanders het gesê die huis het vermoedelik begin brand toe daar vuur gemaak is, en wind die vlamme vinnig laat versprei het.
