’n Tragiese voorval het die gemeenskap van Kutlwanong by Odendaalsrus geruk toe ’n 11-jarige seun Saterdag verdrink het in ‘n oop gat op ’n konstruksieterrein in die K5-afdeling van Kutlwanong.

Sersant Palesa Thabana sê volgens voorlopige inligting is drie seuns tussen die ouderdomme van 10 en 11 jaar omstreeks 15:30 op 2 Augustus gesien waar hulle in ’n modderput, gevul met afvalwater, geswem het. Die kinders het klaarblyklik in die modder vasgeval. Twee van die seuns, beide 10 jaar oud, het egter daarin geslaag om te kon uitkom.

Polisieduikers van Welkom onder bevel van sersant Arno Cronje, is na die toneel ontbied. In samewerking met die Matjhabeng Brandweer is die liggaam van die 11-jarige seun later daardie aand omstreeks 20:20 uit die rioolwater verwyder.

Nooddienspersoneel het die seun op die toneel dood verklaar.

Die voorval het kommer laat ontstaan oor kinders se toegang tot onveilige konstruksieterreine, veral dié waar water of afvalwater teenwoordig is.