Die DA sê hy is diep bekommerd nadat dit aan die lig gekom het dat 29 Lede van die polisie in die Vrystaat tussen 2021 en 2025 selfmoord gepleeg. Die syfer is bekend gemaak ná ’n vraag in die Vrystaatse Wetgewer.

Oorsigbesoeke aan polisiestasies en gesprekke met individuele lede van die polisiediens toon dat polisielede onder uiters stresvolle omstandighede werk.

Dr. Roy Jankielsohn, die DA se woordvoerder vir gemeenskapsveiligheid in die Vrystaatse Wetgewer sê daar word van polisiebeamptes verwag om resultate te lewer ten spyte van onvoldoende hulpbronne soos voertuie, rekenaars, drukkers en basiese toerusting “Hulle werk in vervalle geboue wat professionaliteit ondermyn, en word dikwels onderwerp aan afknouery, viktimisasie en ’n algehele gebrek aan empatie van senior bestuur,

Ander stresvolle omstandighede wat uitgelig is, sluit in ‘n gebrek aan traumabestuur, bevorderingsgeleenthede en swak vooruitsigte vir loopbaanontwikkeling, lang werksure, stresvolle werksomgewings en verpligte oorplasings wat druk op polisielede en hul gesinne plaas.

Daar word ook verwys na onrealistiese werksladings met speurders, insluitend gespesialiseerde eenhede wat gemiddeld 395 dossiere per persoon hanteer tewyl die ideaal 100 per persoon is.

’n Gewelddadige en negatiewe werksomgewing, waar beamptes daagliks met misdaadtonele, slagoffers en misdadigers gekonfronteer word, is ook uitgelig.

Jankielsohn sê die gebrek aan deurlopende opleiding en ondersteuning het die doeltreffendheid van die SAPD só beperk dat baie wetsgehoorsame inwoners vertroue in die polisiediens verloor om die stryd teen misdaad te wen.

Jankielsohn sê dit is duidelik dat dringende ingryping nodig is om waardigheid, ondersteuning en professionaliteit in die polisie te herstel, en te verseker dat dié wat die gemeenskap moet beskerm, nie self deur die stelsel verlate en gebreek gelaat word nie.