Nagenoeg R5 000 skade is die afgelope weke weer by Parys se geskiedkundige hangbrug oor die Vaalrivier deur misdadigers en vandale aangerig. Nie net is die solarligte wat minder as ‘n jaar gelede deur vrywilligers uit eie sak hier opgesit is, gesteel nie, maar kon graffiti vandale ook weer nie hul hande tuishou nie.

Die graffiti is Maandag toegeverf deur Philiip en Johannes van KellRoy Tuindienste, danksy Stephanie Fourie wat sedert die opknapping van die brug en mooimaak van die omgewing hier steeds omsien na die brug. Die solarligte gaan egter nie vervang word nie.

Daar moes Maandag ook weer slotte van die brug verwyder word, ten spyte daarvan dat daar met die herstel van die brug ‘n alternatief met die Mür de Souveniers daargestel is, juis vir mense om daar hul slotte te kon hang wanneeer hulle die brug besoek.

In die verlede het die gewig van slotte wat mense aan die brug hang, groot skade aan die draadwerk weerskante van die brug se loopvlak veroorsaak.
Stephanie en ‘n handjievol omgeehande sien om dat die rivieroewer by die hangbrug weekliks skoongemaak, die gras gesny en vullisdromme leeggemaak word, maar week na week moet van gebruikte kondome tot wegneemete houers hier opgetel word. Mense stort selfs hul huishoudelike vullis in die dromme.

Die voortdurende skoonmaak en regmaak kos ‘n aardige bedrag – geld wat ander betaal om die werk van misdadigers en vandale reg te maak.

Wanneer jy verdagte bewegings by die brug sou sien, rapporteer dit asseblief aan sekuriteitsmaatskappye en die polisie. Parys se hangbrug is nie net ‘n deel van die dorp se geskiedenis nie, dit dra by tot toerisme wat die dorp se enigste ekonomiese dryfveer is.