Ses vermeende kapers wat met ‘n vragmotor met meer as ‘n halfmiljoen rand se vleis op die R557 betrap is, sal Maandag  in die Carletonville-landdroshof verskyn op aanklagte van kaping en ontvoering.

Kolonel Adéle Myburgh sê die ses tussen die ouderdom van 28 en 48 is Donderdag gearresteer nadat die polisie inligting gekry het oor die moontlike kaping van ‘n vragmotor wat meer as R500 000 se vleis vervoer het.

Myburgh sê die verdagtes is voorgelê op die R557 tussen Carletonville en Randfontein kort nadat die vragmotor die oggend om 07:45 gekaap is.

Lede van die polisie se teenbende eenheid, die Dwelmtaakspan, Taktiese Reaksiespan (Klerksdorp), Johannesburg K99, Carletonville-speurders, Gauteng Wesrand Distrik Landelike Veiligheid en private sekuriteitsmaatskappye was by die multidissiplinêre operasie betrokke.

Tydens die arrestasie is beslag gelê op die vragmotor en die vleis, sowel as nog drie voertuie wat tydens die misdaad gebruik is.