Verbeel jou kleurvolle blombeddings by elke ingang van die dorp. Blombakke op elke sypaadjie. Sypaadjie-eilande en parke netjies versorg. Dit is die droom van MooiParys se Braam Cillliers en sy span vir die dorp se 150ste bestaansjaarviering wat in 2026 kleurvol gevier sal word.

Verskeie organisasies tesame met Parys Info & Tourism en met die aansteeklike entoesiasme van Selma Kok, vat alreeds hande en werk hard agter die skerms om van die feesjaar ‘n groot hoogtepunt te maak.

Vanoggend het MooiParys se Abel onder meer begin met die voorbereiding van beddings in die hoofstraat om blomme te plant, en sal inwoners en besoekers eersdaags begroet word met ‘n kleurryke blomprentjie om die dorp te vier. Hierdie is dan ook die eerste bedding in die middedorp wat mooi gemaak is.

So met die wegstap nadat die foto van Abel by die bedding voor Parys Auctioneers geneem is, vra Abel mooi: “Sê vir die mense om nie te mors nie.” Jy sien die liefde vir die dorp en die trots waarmee hy daar staan en skoffel in die bedding.

Braam vertel dat die gedagte om die dorpsingange te verfraai al ‘n paar jaar gelede begin het toe MooiParys, ‘n nie-winsgewende vrywilliger organisasie, begin het om met die hulp van borge die dorpsingange skoon te maak wanneer daar weekliks gewerk word om die hoofstraat en sakekern skoon te hou.

Die idee om ook die sypaadjies in die middedorp te verfraai, het hy by sy seun in Engeland gesien waar blomme oral die strate versier, vertel Braam. Dieselfde gesig sien jy ook in Stellenbosch.

Blomme by dorpsingange

In 2023 is Parysenaars en besoekers aan die dorp die eerste keer verras met die kleurvolle blomgesig van Namakwalandse daisies en Afrikanertjies wat jou vrolik langs Parys se hoofstraat kom groet het danksy MooiParys se Paul Noome en ander omgee-inwoners wat help plant en water gee het.

Die netjiese dorpsingange het al gesorg vir vele komplimente van besoekers wat sien hoe skoon en mooi die dorp is. Nou is dit weer tyd om te plant en mooi te maak vir wanneer die dorp sy feesvere moet regskud.

Die gedagte is dat besighede met MooiParys sal saamwerk om te help om herwinbare plastiek blombakke te borg, en die blomme sal versorg wat dan veral in die dorp se toeriste korridor geplaas sal word. Die dorp se hardewarewinkels en kwekerye het reeds hul steun vir die projek gegee.

Geesdriftige tuiniers se hulp gevra

Om Parys regtig te laat blom, is ook inwoners se hulp nodig want die dorp is bekend vir sy kranige tuiniers en pragtige tuine. Kom deel jou idees, jou plantjies, jou liefde vir groei. Elke bydrae word ‘n stukkie kleur in die groter prentjie om Parys te laat blom.

Blomme, saad en saailinge gesoek

Daar word gesoek na enige skenkings van saad, saailinge, en plante wat maklik onderhoubaar is, en nie hoër as kniehoogte staan. Selfs potgrond of kontant skenkings vir die blombakke is welkom.

Of kom bied jou hulp aan en help om die sypaadjie-eilande mooi te maak. Die vreugde van tuinmaak is sielsverrykend. Des te meer die wete dat jy ‘n verskil kan maak..

Dorp van die Jaar

Onthou – Parys kan in 2026 weer inskryf vir Kwêla Se Dorp van die Jaar. En hoe mooi kan dit nie wees as die dorp ook sy blomprag kan voeg tot die vele ander aantreklikhede wat Parys bied.

So kan jy help

Skakel Braam by 072 779 4079 of gebruik MooiParys se bankbesonderhede: Absa, takkode: 005920, rekeningnommer: 410 5545 894, as jy deel wil wees van hierdie mooi inisiatief. Tuindienste se hulp met van die sypaadjies en eilande sal ook verwelkom word.