Nog ‘n sluishek sal vanoggend om 10:00 by Vaaldam toegemaak word wat beteken dat daar dan net drie sluishekke by die dam oop sal wees.
Vaaldam is nou 101,24% vol met invloei gemeet teen 329,78 kubieke meter per sekonde, en uitvloei teen 431 kubieke meter per sekonde. Daar is 5mm reën in die Vaaldam se opvangsgebied gemeet.
Bloemhofdam
Bloemhofdam is nou 104,96% vol. Water word tans uitgelaat teen 1 002.3 kubieke meter per sekonde. Status quo sal vandag by Bloemhofdam gehandhaaf word.
Die Barrage het nog een sluishek oopgehad teen 07:00 vanoggend en word water uitgelaat teen 305 kubieke meter per sekonde.
Schoemansdriftbrug
Die Schoemansdriftbrug in die Vredefort Koepel is weer oop nadat die Vaalrivier se watervlak oor die naweek aansienlik gedaal het nadat daar sedert Saterdag vier sluishekke toegemaak is.
Teen 18:00 Sondagaand het die rivier se watervlak by dié laagwaterbrug 1,95m gemeet en die watervloei is gemeet teen 791,5 kubieke meter per sekonde.
Nog reën kom
Daar is vir die Vrystaat vir vandag en ook die res van die week reën voorspel, met donderstorms veral in die oostelike dele van die provinsie. Mense moet bedag wees op wind, donderweer en skiellike reënbuie.
Laatmiddagdonderstorms kan veral daagliks hoofsaaklik in die oostelike en noordoostelike dele van die Vrystaat verwag word.
Swaar reën is veral ook vir die week in die Vaaldam se opvangsgebied voorspel.
