Met tien sluishekke oop by Vaaldam en die Vaalrivier se watervlak wat aansienlik die afgelope twee dae gestyg het, hou dié bekende klipkunswerk onder die brug oor die Vaalrivier by Egweni River Lodge in Parys, nog net-net kop bo water.
Die kunswerk is deur Deon TerBlanche in Oktober 2018 gemaak om bewusmaking van die bewaring van ons land se waterbronne en visspesies te skep, nadat rioolbesoedeling van die Vaalrivier tot groot getalle visvrektes gelei het.
Die kunswerk is 7m x 1,5m en weeg meer as 350kg. Dit is gemaak van Parys-graniet, eie aan die omgewing en draad, en het Deon die enorme taak aangepak om die kunswerk met sy sowat 90 granietklippe onder die brug te hang. Toe dit destyds gehang is, was dit nagenoeg 2-2,2m bo die watervlak, het Deon destyds aan Gazette gesê.
Die foto van die Vaal se geelvis klipkunswerk is geneem toe die Vaalrivier nie in vloed was nie.
Sedertdien is daar telkens asem opgehou as die Vaal se water begin bokspring het, maar het Parys se besondere geelvis klipkunswerk, nog elke keer kop bo water gehou en droog daarvan afgekom behalwe in Februarie 2023 toe sy onderste vin wel die water geraak het soos op die foto hieronder gesien kan word.
En nou stoei hy weer om bo die water te bly.
