‘n Minderjarige seun van Welkom sal Maandag op ‘n klag van moord in die hof verskyn, na die dood van die 8-jarige Naledi Ramaisa, wie se liggaam vroeër vandeesweek in ‘n 1 000 liter houer in ‘n hut in Senekal gekry is.

Naledi is op 15 Januarie as vermis aangemeld, en is haar liggaam enkele meters van die huis waar sy die laaste keer gesien is, in die Tambo-woonbuurt in Matwabeng, Senekal gekry, het polisiewoordvoerder Sinah Mpakane gesê.

Naledi se tannie het haar Donderdagoggend by die huis gelos toe sy gaan werk het. Toe die tannie later by die huis kom was Naledi weg.

Haar liggaam is in ‘n hut net langsaan die huis van Naledi se tannie gekry nadat die polisie onraad vermoed het en die hut deursoek het. Mpakane sê daar is vasgestel dat die eienaar van die hut in Welkom bly en dit in die sorg van haar 16-jarige nefie gelos het.

Die polisie het die seun by die skool gekry en het volgens Mpakane erken dat hy die oorledene met ‘n klip geslaan  het toe sy perskes in ‘n boom gepluk het. Mpakane sê volgens die seun het hy die bewustelose meisie in die hut ingesleep en toe in die houer geplaas.