Minimum loon vir die eerste keer bo R30 per uur
Die verhoogde nasionale minimum loon tree op 1 Maart in werking.
Die nasionale minimumloon word van 1 Maart tot R30,23 per uur verhoog. Die nuwe tarief is op 3 Februarie deur Nomakhosazana Meth, minister van werkskepping en arbeid, in die staatskoerant gepubliseer.
Dit sal die eerste keer wees dat die minimumloon per uur nou bo R30 sal wees.
Na raming is daar 5,5 miljoen werkers in Suid-Afrika wat die nasionale minimumloon verdien.
Dit sluit onder meer huiswerkers en plaaswerkers in.
Die Transvaalse Landbou Unie (TLU SA) het in reaksie op die aankondiging gesê die loonverhoging kom in ‘n tyd wat die landboubedryf reeds onder geweldige druk is onder meer weens droogte en die Bek-en-klouseerkrisis wat lei tot spanning op produsente en produksieverliese.
Dit alleen dra reeds by tot werksverliese in landelike gemeenskappe, het die organisasie gesê.
