Inwoners van die Emfuleni-plaaslike munisipaliteit is Woensdagaand weer in rou gedompel toe vier jongmense tragies gesterf het in ‘n motorongeluk in Frikkie Meyer-boulevard, Vanderbijlpark. Daar word vermoed dat die bestuurder van ’n bakkie moontlik vir ’n groot slaggat kon uitgeswaai en toe teen ’n boom gebots het. Die ongeluk het omstreeks 20:30 plaasgevind.
Volgens Gerda Senekal, VF Plus-raadslid in die Emfuleni Plaaslike Munisipaliteit, was die slaggat met rioolwater gevul en feitlik onsigbaar in die donker.
Die slagoffers, tussen 20 en 22 jaar oud, het vroeër die aand by die bestuurder se huis gekuier. Hy het aangebied om sy vriende huis toe te neem, maar almal is tragies op die toneel oorlede, het Senekal gesê.
Die tragedie volg net ’n maand ná die ongeluk op die R553 naby Vanderbijlpark waarin 14 skoolleerders omgekom het toe ’n minibus-taxi teen ’n vragmotor gebots het.
Senekal sê verder die VF Plus het die gevaarlike slaggat in Frikkie Meyer-boulevard herhaaldelik onder die aandag van die departement van paaie en vervoer gebring, maar sonder sukses.
Volgens Senekal het die Emfuleni munisipaliteit onlangs ’n salarisverhoging van R40 000 per maand, terugwerkend tot Julie 2025, aan tien senior bestuurders toegestaan. Die VF Plus het dié besluit nie gesteun nie en het sê fondse kan eerder aangewend word om slaggate en paaie te herstel.
Die VF Plus het vanoggend gesprek gevoer met burgemeester, Sipo Radebe, en stadsbestuurder, April Ntuli, en geëis dat die slaggat en straatligte in Frikkie Meyer-boulevard onmiddellik herstel word.
