Twee mans, onderskeidelik 20 en 21 jaar oud, is in hegtenis geneem nadat hulle in besit van ‘n vermoedelik gesteelde voertuig betrap is.

Volgens polisiewoordvoerder Josephine Rani het ‘n intelligensiegedrewe operasie gelei tot die arrestasie van die verdagtes.

Rani sê lede van die Sasolburg-snelwegpatrollie het Sondag, 5 Julie omstreeks 02:00 inligting ontvang oor ‘n wit dubbelkajuitbakkie wat na bewering vroeër van sy eienaar by ‘n plaaslike taverne in Kroonstad gekaap is en in die rigting van Sasolburg onderweg was.

Die polisie het ‘n padblokkade op die R82 uitgevoer en die voertuig onderskep. Die twee insittendes is ondervra, maar kon volgens Rani nie ‘n bevredigende verduideliking gee oor hoe hulle in besit van die voertuig gekom het nie.

‘n Luggeweer, wat vermoedelik tydens die kaping gebruik is, is saam met die voertuig beslag gelê.

Die twee verdagtes sal na verwagting binnekort in die Sasolburg-landdroshof verskyn op ‘n aanklag van besit van ‘n vermoedelik gesteelde voertuig.