Daar is oor die naweek begin met die verskuiwing van van die mobiele klaskamers by die Schonkenville Intermediëre skool. Dit is gedoen om plek te maak vir ses nuwe klaskamers wat gebou gaan word waar hierdie mobiele klaskamers gestaan het.
Die graad 1 tot 3-leerders is die week tydelik in die gemeenskapsaal onderrig tot die verskuiwing van die mobiele klaskamers afgehandel is. Sterk wind het oor die naweek dié taak bemoeilik.
Volgens die skool se adjunkhoof, me. De Lange, sal die nuwe klaskamers wat nou gebou gaan word, gebruik word vir die intermediêre fase (graad 4 tot 7-leerders).

Die agt asbesklaskamers wat in onbruik is, maar steeds op die skoolterrein staan, sal op ‘n later stadium verwyder word om plek te maak vir nog nuwe klaskamers wat gebou gaan word.
Daar is lank reeds ‘n behoefte vir meer klaskamers by die skool wat met 1 022 leerders van graad R tot 12, letterlik uit sy nate bars.