Medelye het gister op sosiale media ingestroom na die skiellike dood van Teboho Joala van Rand Water wat gister, 29 Januarie, gesterf het in ‘n skietvoorval tydens ‘n funksie by Zakariyya Park in Johannesburg waar skooluniforms en skoolskoene as deel van Rand Water se Terug Skool Toe-veldtog oorhandig is.

Nog ‘n persoon is ook in die skietvoorval noodlottig gewond.

‘n Onbekende aantal verdagtes het die oggend tydens die funksie by die gemeenskapsaal ingestorm en skote afgevuur. Hulle het daarna in ‘n wit voertuig van die toneel gevlug.

Nog drie ander mense onder wie Sithembiso Zungu, hoofsweep van die Johannesburgse metroraad is tydens die voorval gewond.