Enorme vervoerkoste weens sloering met bouprojek by korrektiewe sentrum
Die projek is in Februarie aan 'n nuwe kontrakteur oorhandig en moet teen Augustus 2025 voltooi wees.
Sloering met die bouprojek vir die vergroting en opknapping van die Parys Korrektiewe Sentrum kos belastingbetalers gemiddeld R345 000 per jaar aan die vervoer van die 35 korrektiewe dienste personeellede wat daagliks tussen Parys en Sasolburg vervoer moes word. Dit afgesien van die tyd wat op die pad spandeer word, en voertuie wat hiervoor beskikbaar gestel moet word.
Die projek is in Februarie aan ‘n nuwe kontrakteur oorhandig en moet teen Augustus 2025 voltooi wees.
Aanvanklik is R282 miljoen vir die projek begroot maar het dit vir maande stilgestaan omdat die vorige kontrakteur se kontrak weens swak prestasie beeïndig is.
Die nuwe generasie fasiliteit sal met voltooiing 266 beddens hê, teenoor die 84 beddens wat die ou korrektiewe sentrum gehad het, het Singabakho Nxumalo, woordvoerder van die Departement Korrektiewe Dienste gesê. Met die oorhandiging van die kontrak is verwys na die groeiende aantal gevangenes landwyd en die tekort aan korrekte sentrums.
Tog het die sloering van die projek veroorsaak dat die Sasolburgse Korrektiewe Sentrum nou 153% beset is, sê George Michalakis, DA LP vir die gekose komitee vir veiligheid en justisie, na aanleiding van vrae wat oor die projek aan die departement gevra is.
Michalakis sê dat die DA met ‘n oorsigbesoek vroeër vanjaar gevind het dat nie veel gevorder is deur die vorige kontrakteur, NJR Projects (later G5 Group) van die tenderpreneur Edwin Sodi nie. Hy sê van die subkontrakteurs het ook beweer dat hul nie deur die kontrakteur betaal is nie.
Vroeër is kontantvloei probleme van die vorige kontrakteur uitgewys as die hoofrede waarom konstruksiewerk nie binne die vyf jaar kontraktermyn voltooi is nie. Die situasie is deur Covid vererger, is toe gesê/
Die bouperseel is aanvanklik in Februarie 2019 aan die vorige kontrakteur oorhandig, en moes die 36 maande kontrak teen April 2023 voltooi wees. In Februarie 2023 is die kontrak egter met G5 beeïndig. Luidens ‘n verslag was die projek net 55% voltooi met die kontraktermyn wat al byna verstryk het. Van die toegekende kontrakkoste is R130 879 446,811 toe reeds spandeer.
Michalakis sê die nuwe kontrakteur toon wel vordering met die projek. Beamptes van die Departement van Openbare Werke en Infrastruktuur wat in Februarie die oorhandigingseremonie aan die nuwe kontrakteur bygewoon het, saam met verteenwoordigers van die Development Bank of Southern Africa, het ook hul vertroue uitgespreek in die vermoë en kundigheid van die nuwe kontrakteur.
Die nuwe generasie fasiliteit sal met voltooiing van die projek ook voorsiening maak vir ‘n mediese fasiliteit, onderrig- en opleidingsfasiliteite, ‘n sokkerveld, en gesofistikeerde sekuriteitselsel met ‘n sentrale beheerkamer, is met die minister se vroeëre besoek gesê.
