Die erns van waterprobleme in die Parys- en omliggende gemeenskappe is Vrydag indringend bespreek tussen die Ngwathe Plaaslike Munisipaliteit, AfriForum, Save Ngwathe, die Metsi Pompong-waterinisiatief en die Departement van Water en Sanitasie (DWS).

Dit volg op ‘n protesoptog verlede week waartydens inwoners hul frustrasie met die waterprobleme in Parys, Tumahole en Schonkenville te kenne gegee het.

Die betrokke partye by die samesprekings het onder meer besluit om saam te werk, en op die lewering van veilige drinkwater aan inwoners as ‘n saak van dringendheid te fokus. Daarbenewens het AfriForum ingestem om, op voorwaarde van samewerking, op sekere van sy hangende regsgedinge met die munisipaliteit te skik.

Die organisasie het egter aangedui dat hy gereed is om voort te gaan met regstappe as samewerking sou misluk. Die vergadering is afgesluit met Ngwathe se waarnemende munisipale bestuurder, dr. F.P. Mothamaha, wat die uitnodiging om samewerking verwelkom het.

AfriForum se prokureurs sal nou met onderhandelinge rakende die skikking begin. “Die uitkoms van dié vergadering is ‘n wen in die belang van die Parys-, Tumahole- en Schonkenville-gemeenskappe, en skep ruimte vir samewerking tussen die owerheid en gemeenskappe om saam aan die oplossing te werk.

Die ware oorwinning sal egter kom wanneer inwoners weer sonder huiwering of vrees die water uit Parys se krane kan drink. Ons sal nie ophou werk totdat hierdie oorwinning behaal is nie,” het Morné Mostert, AfriForum se bestuurder van plaaslike regeringsake gesê.

AfriForum se ingenieursverslag wat aan die munisipale bestuurder oorhandig is, sal as vertrekpunt van die partye se samewerking in die herstel van die watersuiweringsaanleg dien, is gesê.