Wêreldkampioenskap-hoogtes vir gedugte SA-sweeftuigspan
Groot eer vir dié twee Suid-Afrikaners
Die 33-jarige Riaan Denner van Parys is tans by die FAI Wêreld Sweeftuigkampioenskappe in Uvalde, Texas, waar hy saam met spanmaat, Dirk Coetzee in ‘n Arcus M aan die 20m 2-sitplek klas deelneem. Sestien spanne van regoor die wêreld ding vanjaar mee in dié klas.
Dit is reeds die tweede keer dat Riaan gekies is om sy land by die wêreldkampioenskappe te gaan vertenwoordig. Hy het twee jaar gelede by die wêreldkampioenskappe in Hongarye saam met sy spanmaat Oscar Goudriaan, ‘n tweede plek verower. Vanjaar is die 38ste sweeftuig wêreldkampioenskap en ding deelnemers mee in drie klasse.
Riaan het op 16-jarige ouderdom begin sweeftuig vlieg. Oor die jare het dit ‘n stokperdjie geword waarvoor hy ‘n groot passie het. Hy werk as toetsvlieënier vir Sling Aircraft in Johannesburg.
Sy spanmaat, Dirk, bly in Dubai, maar is ‘n gebore Suid-Afrikaner wat as vlugkaptein vir Emirates Lugdiens werk.
